2023-2024-jıllar gúz-qıs dáwirinde puqaralar qáwipsizligin támiynlew, ayrıqsha jaǵdaylardıń aldın alıw boyınsha úyreniwler alıp barıldı

Búgin Qaraqalpaqstan Respublikası Ayrıqsha jaǵdaylar basqarması baslıǵı orınbasarı mayor Dj.Esenbaev hám basqarmanıń bólim baslıǵı podpolkovnik M.Xalmuratovlar qatnasında Respublikamız boylap ótkerilip atırǵan gúz-qıs máwsimine tayarlıq kóriw hám máwsim dawamında ayrıqsha jaǵdaylardı boldırmaw, órt qáwipsizligin támiynlew, puqaralardıń iyis gazinen záhárleniwiniń aldın alıw maqsetinde Shomanay rayonı “Monshaqlı” mákan puqaralar jıyını Túrkistan kóshesinde jaylasqan kóp qabatlı turaq jaylarda jasawshı puqaralar úyleri hám jılıtıw qazanları, úylerge kelip turǵan tábiyiy gaz tarmaqlarınıń jaǵdayı úyrenilip shıǵıldı.

Úyreniwler dawamında anıqlanǵan kemshiliklerdi saplastırıw boyınsha tiyisli qániygelerge tapsırmalar berilip, puqaralarǵa gaz hám elektr úskenelerinen tuwrı paydalanıw, gúz-qıs máwsimi aldınan ısıtıw qazanlarınıń morıları hám samallatıw kanalların tazalap máwsimge puxta tayarlıq kóriw kerekligi haqqında profilaktikalıq túsinik jumısların alıp bardı.

Ekonomika tarmaqları, sociallıq taraw obiektleri hám úy-jay fondın 2023-2024-jıllar gúz-qıs dáwirinde ayrıqsha jaǵdaylardan qorǵawǵa qaratılǵan ilájlardı ámelge asırıw maqsetinde rayon hákimligi, ayrıqsha jaǵdaylar bólimi, gaz hám elektr támiynatı kárxanaları hám de rayonlıq birge islesiwshi taraw wákilleri menen birgelikte kúndelikli aymaqlarǵa bólistiriw jumısları alıp barılıp, orınlarda úyreniw jumısları dawam etpekte. Bul ilájlardan tiykarǵı maqset júz beriwi múmkin bolǵan órtler, ayrıqsha jaǵdaylar hám puqaralardıń iyis gazinen záhárleniwiniń aldın alıw bolıp tabıladı.