Shomanay rayonında Ózbekstan Xalıq demokratiyalıq partiyası Qaraqalpaqstan Respublikalıq Keńesi tárepinen «Ózbekstan-2030» strategiyasınıń mazmun-mánisine baǵıshlanǵan ushırasıw shólkemlestirildi.

Shomanay kásip-óner mektebi májlisler zalında bolıp ótken ushırasıwda Ózbekstan Xalıq demokratiyalıq partiyası Qaraqalpaqstan Respublikalıq Keńesi xızmetkerleri, Xalıq deputatları Shomanay rayonlıq Keńesindegi Ózbekstan Xalıq demokratiyalıq partiyası deputatlıq toparı aǵzalar, student jaslar hám de ǵalaba xabar quralları wákilleri qatnastı.

Ushırasıwdı Shomanay kásip-óner mektebi direktorı, partiya belsendisi Uluǵbek Sultamuratov ashıp berip, «Ózbekstan-2030» startegiyası sheńberinde Qaraqalpaqstan Respublikası xalqınıń turmıs abadanlıǵın asırıwǵa qaratılǵan kóplep is-ilajlar belgilengenligi, usı wazıypa hám maqsetlerdi ámelge asırıwda jámiyetshilik qadaǵalawdı alıp barıwdıń áhmiyeti joqarı ekenligin aytıp ótti. Soń ushırasıwda bayanatshı sıpatında qatnasqan Ózbekstan Xalıq demokratiyalıq partiyası Qaraqalpaqstan Respublikalıq Keńesi baslıǵınıń orınbasarı Maxmud Esengeldiev jaslarǵa «Ózbekstan-2030» startegiyası, onnan kútiletuǵın maqset hám nátiyjeler, sonday-aq onı 2023-jılda ámelge asırıw is-ilajları boyınsha Ózbekstan Respublikası Prezidentiniń párman hám qararınıń mazmun-mánisi haqqında ushırasıw qatnasıwshılarına keńnen túsindirip berdi. 

Shomanay rayonı hákimligi málimleme xızmeti