Shomanay rayonında paxta-jıyın terim mapazı baslandı

Mámleketimizde paxta jetistiriw xalıq xojalıǵında úlken áhmiyetke iye. Sózimizge dálil retinde, Ózbekstan paxta jetistiriw boyınsha búgingi kúnde jáhán reytińinde 6-orında turadı. Bunda hadal mańlay teri arqalı jerge miyir hám islew berip, shańaraqların baǵıp atırǵan miynetkesh diyxan hám fermerlerimizdiń xızmetleri alǵısqa ılayıqlı

Búgin Shomanay rayonındaǵı «Agro Shumanay klaster» JShJ hám «Eko texstil» JShJ lerinde usı jılǵı jetistirilgen paxta zúráátin qabıl etiw baslandı. Paxta qabıllaw ilajına rayon hákimi B.Yangibaev, Qaraqalpaqstan Respublikası Joqarǵı Keńesi tárepinen Shomanay rayonına bekitilgen wákili J.Uzaqov, sektor baslıqları, klasterler menen fermer xojalıqlar baslıqları qatnastı.
Eń birinshilerden bolıp paxta tapsırǵan fermer xojalıqları rayon hákimi hám sektor baslıqları tárepinen sıylıqlandı.

Rayonda paxtadan mol zúráát jetistiriw ushın barlıq qolaylı sharayatlar jaratılıp, zárúrli materiallıq resurslar óz múddetlerinde jetkerilip berilmekte. Shomanaylı dıyxan-fermer xojalıqları usı máwsimde ayanbay xızmet etip, mol hasıl alıwına isenemiz.

Shomanay rayonı hákimligi málimleme xızmeti.

@Shomanay_rayon