“BIR NURANÍY ON JASQA JUWAPKER”

Shomanay rayonındaǵı Mádeniyat sarayında “Bir nuranıy on jasqa juwapker”  tańlawınıń rayonlıq basqıshı bolıp ótti. Oǵan “Bir nuranıy on jasqa juwapker” principi tiykarında ózleri jasap atırǵan máhállelerde tárbiyası awır, jámlespegen jaslarǵa biriktirilgen zamanagóy pikirleytuǵın, úlken ómir tájiriybesine iye nuranıylar qatnastı. Tańlawda Qaraqalpaqstan Respublikası “Nuranıy qorı” bólimi baslıǵı T.Abdijabbarov shıǵıp sóylep, qatnasıwshılarǵa áwmet tiledi.
Tańlaw 3 shárt boyınsha ótkerildi. Nuranıylar dáslep ózleriniń ómir bayanı menen tanıstırdı. Olardıń óz iskerligi boyınsha tayarlap kelgen fotoalbomları hám videorolikleri tóreshiler tárepinen bahalanıp barıldı.

Jarıs juwmaǵında “Monshaqlı” mákan puqaralar jıyınınan qatnasqan belsendi nuranıy Nawrızbaev Qalbay sıylı 1-orındı jeńip alıp, tańlawdıń respublikalıq basqıshına jollama aldı. “Mádeniyat” mákan puqaralar jıyınınan Almagul Zayirova sıylı 2-orındı, “Qarabaylı” mákan puqaralar jıyınınan Qutlıbiyke Gayipova sıylı 3-orındı, “Diyxanabad” awıl puqaralar jıyınınan Jumabay Avezmuratov  4-orındı iyeledi. Jeńimpazlar Qaraqalpaqstan Respublikası “Nuranıy qorı” tárepinen aqshalay sıylıqlandı. Tańlaw dawamında  baqsı-jırawlar janlı hawazda qosıqlar atqarıp, qatnasıwshılardıń kewillerin xoshladı.