Milletlerara tatıwlıq tınıshlıqtıń bekkem tiykarı

Milletlerara tatıwlıqtı bir jámiyette jasap, birden-bir maqset jolında miynet qılıp atırǵan túrli millet hám elatlarǵa tiyisli adamlar arasındaǵı óz-ara húrmet, mehir-aqıbet, doslıq hám awızbirshiliktiń ruwxıy tiregi dep ataw múmkin.

Mámleketimiz aymaǵında ázelden kóplegen millet hám elat wákilleri awızbirshilikte jasap kelmekte. Xalıqımız ázeldan tolerantlıq, miymandoslıq, keshirimlilik, basqalardıń úrp-ádet hám qádiriyatların izzetlew sıyaqlı ulıwma insanıylıq páziyletlerin kórsetip kelgen. Milletlerara tatıwlıq túrli xalıqlar birgelikte jasaytuǵın region hám xalıqlardıń milliy rawajlanıwın belgilep, tınıshlıq hám párawanlıqtıń kepili bolıp xızmet etedi.
Házirgi waqıtta elimizde 130 dan artıq millet hám elat wákilleri óz-ara tınısh-tatıwlıqta turmıs keshirip atırǵanı pikirlerimizdiń ayqın dálili bolıp tabıladı. Bunnan tısqarı, “Jańa Ózbekstannıń rawajlanıw strategiyası”nıń ayırım baǵdarları milletlerara tatıwlıq múnásebetlerin jaqsılawǵa qaratılǵan.
Milletlerara tatıwlıqqa itibar qaratılıwı Ózbekstanda jasap atırǵan millet hám xalıqlardıń túrli tarawlarda iskerlik kórsetiwi, úrp-ádet hám dástúrlerden xabarlı bolıwına imkaniyat jaratıp atır. Bul tikkeley ruwxıy qádiriyatlardıń millet ishinde rawaj tawıp, jáne de bayıwına alıp keledi.
Házirgi kúnde túrli millet hám elatlardiń milliy dástúr hám qádiriyatların saqlap qásterlew, olardı jáne de rawajlandırıw, bayıtıw máselesi mámleketimizdiń turaqlı itibarında bolıp kelmekte. Búgin elimizdegi ulıwma bilim beriw mekteplerinde 7 tilde – ózbek, qaraqalpaq, orıs, qırǵız, turkmen, qazaq hám tájik tillerinde bilim berilip atırǵanı, sonıń menen birge, ǵalaba xabar quralları Ózbekstanda jasawshı túrli milletlerdiń 10 tilde jumıs alıp barıp atırǵanı bunıń úlgisi bolıp tabıladı.
2023-jıldıń 6-iyul kuni “Monshaqlı” mákán puqaralar jıyınında hayal-qızlar belsendisi Sh.Yakupova baslaması menen «Ózbekstan-ulıwma úyimiz» uranı sheńberinde mádeniy iláj shólkemlestirildi.

Ilájge máhállede jasawshı túrli millet wákillerinen ibarat bolǵan puqaralar qatnastı. Ilájde túrli millet wákilleriniń milliyligin sáwlelendiriwshi kiyim-kenshekleri, milliy qosıqları jiynalǵanlarda úlken tásir qaldırdı. Ruwxıy aǵartıwshılıq bólimi hám málimleme resurs orayı menen birgelikte doslıq, tatıwlıq boyınsha naqıl-maqallar viktorinası shólkemlestirilip, jeńimpazlarǵa kitaplar sawǵa etildi.

Shomanay rayonı hákimligi málimleme xızmeti