Qaraqalpaqstan Respublikası Joqarǵı Keńesi tárepinen dúzilgen Shomanay rayonınıń “Kópti kórgen belgili, arnawlı, úgit-násiyat” toparınıń ataqlı hámde húrmetli nuranıyları menen ushırasıw bolıp ótti.

Ushırasıw «Mádeniyat» mákan puqaralar jıyını aymaǵındaǵı 13-sanlı Balalar muzıka mektebiniń májilisler zalında boldı.

Májiliske 45 nuranıy qatnastı hám de  Qaraqalpaqstan Respublikası Joqarǵı Keńesi baslıǵı, Joqarǵı Keńes deputatı T. Romanov, Qaraqalpaqstan Respublikası “Nuranıy qorı” bólimi baslıǵı T. Abdijabbarov, Qaraqalpaqstan Respublikası Mádeniyat Ministri K.Turdiev, “Nuranıy qorı” Shomanay rayonı bólimi baslıǵı D.Nietullaev hám Shomanay rayonı hákimliginen A.Bekmuratovlar qatnastı hám shıǵıp sóyledi.
Májiliste úsh másele qaraldı:
jaslardı watansúyiwshilik ruwxında tárbiyalaw, olarda shúkirshilik tuyǵısın oyatıw, milletler ara tatıwlıqtı bekkemlew, tınıshlıqtıń qádirine jetiw,  bizge jat bolǵan ekstremizm, separatizm hám terrorizmge uqsaǵan  illetlerge qosılmaw, tuwrı joldan jurıw, hár qıylı buzǵınshı, qadaǵan etilgen diniy hám siyasiy aǵımlardan awlaq bolıw, milliy qádiryatlarımızdı saqlaw, neshe ásirlerden beri qáliplesken dástúr hám úrp-ádetlerimizge sadıq bolıw haqqında keńnen túsinikler berildi.

Ushırasıwda sońǵı jıllarda mámleketimizde alıp barılıp atırǵan keń kólemli reformalar, barlıq tarawdaǵı ózgerisler, Qaraqalpaqstan Respublikasına berilip atırǵan kóp ǵana jeńillikler haqqında birme-bir tolıq aytıp ótildi. Sırtqı  kúshlerdiń tásiri haqqında, jer júzindegi bolıp atırǵan siyasiy oyınlar, ıdıratıwshı háreketler haqqında da jıynalǵanlarǵa maǵlıwmat  berildi.
Qaraqalpaqstan Respublikasınıń ekonomikalıq rawajlanıw baǵdarları, tiykarǵı kórsetkishler, kelesi jeti jılda názerde tutılıp atırǵan alǵa ilgerilewler boyınsha da keń túsinik berildi. Sonıń menen birge 2022-jıl 1-2-iyul kúnleri bolıp ótken qayǵılı waqıyalar, olardıń aqıbetlerı hám keleshekte bunday unamsız jaǵdaylardıń aldın alıw hám boldırmaw ushın nuranıylar xalıq penen tıǵız baylanısta bolıp,

jaslardı izine ertip jaqsı jolǵa baǵdarlaw boyınsha úlgi bolıwları kerekligi aytıldı. Sonday-aq hár bir jinayat jazasız qalmaytuǵınlıǵın jıynalǵanlarǵa uqtırıldı. Ulıwmalıq tártipsizlikler júz bergende qollanılatuǵın sharalar, jinayat kodeksinen statyalar oqıp berildi.
Keyingi másele boyınsha usı jıl 11-mart kúni qabıl etilgen PQ-92-sanlı “Kekse áwlad wákillerin hár tárepleme qollap-quwatlaw,  olardıń sociallıq belsendiligin asırıw haqqında”ǵı Prezident qararı boyınsha islenip atırǵan jumıslarǵa keńnen toqtaldı. Ásirese, “Bir nuranıy on jasqa juwapker” principi tiykarında jámlespegen jaslardıń mashqalaların sheshiw boyınsha tınısh emes  shańaraqlarǵa, mektep hámde baqshalarǵa biriktirilgen nuranıylardıń jumıslarınıń nátiyjeliligin asırıw boyınsha kelisip alındı.
Usı jıldıń 9-iyul kúni bolıp ótetuǵin  Ózbekstan Respublikası Prezidenti saylawın joqarı dárejede ótkeriw,  nuranıylardıń belsene qatnasıwın támiyinlew boyınsha pikirlesip alındı. Jaqında Húrmetli Prezidentimizdiń Qaraqalpaqstanǵa kelip ótkergen saylaw aldı ushırasıwında aytılǵan rawajlanıw baǵdarları boyınsha keńnen túsinikler berildi. Usı májiliste aytılǵan máselelerdi hárbir máhálle hám awıllarda dodalaw,  hár bir puqaraǵa tuwrı túsindiriw, olardı tuwrı jolǵa baslaw boyınsha kelisip alındı.
Májilis sońında baqsı-jırawlar janlı hawazda qosıqlar atqarıp, qatnasıwshılardıń kewil keypiyatin kóterdi.

Ushırasıwdan soń 45 nuranıy bir dasturxan átirapında jıynalıp sáwbet qurdı. Dásturxan Shomanay rayonına belgili, shıraylı hám payızlı shayxanalardıń biri “Berdibek tex xızmet” JShJ ne qaraslı «Panda» restoranında jayıldı.