Shomanay rayonı Monshaqlı máxállesi Kunxoja kóshesindegi “Órnekli hayallar” háreketi belsendi aǵzası Gúlash apa Ametovanıń shańaraǵında Nawrız taǵamı súmelek pisirildi.

Úlken qazan átirapına jıynalǵan hayal-qızlarımızǵa jası úlken nuranıy apalar duwaǵa qol jayıp, ǵárezsiz elimizge kirip kelgen ullı ayyamnıń qutlı keliwi, jurtımız tınısh, aspanımız ashıq bolıwın, hár bir shańaraq baxıtlı bolıwın tilep jaqsı niyetlerin bildirdi.

Súmelek bayramına Shańaraq hám hayal-qızlar bólimi baslıǵı G.Temirxanova qatnasıp, nuranıy analardı bayram menen qutlıqlap, bayram sawǵasın tapsırdı.

Sonday-aq, nuranıy ana G.Ametova rayonımızda júz berip atırǵan jańalanıwlar, kóshelerdiń asfaltlanıwı, bıyılǵı suwdıń mol keliwi, máhálle imáratınıń jańadan tapsırılıwı hám basqa da alıp barılǵan jumıslardıń barlıǵı Prezidentimiz tárepinen “Insan qádiri” principi tiykarında alıp barılıp atırǵan ádil siyasatınıń ayqın kórinisi ekenligin aytıp ótti.

Sonday-aq Kunxoja kóshesi hayal-qızları jaqsı niyetler menen miyue terekleri nállerin otırǵızdı.

Shomanay rayonı hákimligi málimleme xızmeti.