Sońǵı jıllarda sud-huqıq tarawındaǵı ámelge asırılıp kiyatırǵan reformalar – sud hákimiyatınıń ǵárezsizligin sonday-aq, sudlar jumısında ashıqlıqtı támiyinlew menen bir qatarda puqara hám isbilermenlerdiń huqıqları menen nızamlı máplerin qorǵaw kepilliklerin kúsheytiw imkaniyatın berip kelmekte.

Sonıń menen birge «Jańa Ózbekstan–jańa sud» principi sheńberinde xalıqtıń ádil sudlawǵa erisiw imkaniyatların jáne de keńeytiw ushın sud-huqıq sistemasın reformalawdı jedellestiriw hám tarawǵa aldaǵı xalıqaralıq standartlardı engiziwdi talap etpekte.

Mine usıǵan kóre Ózbekstan Respublikası Prezidentiniń 2023-jıl 16-yanvar kúni 11-sanlı Pármanı qabıl etilip, usı Pármán menen «2023-2026-jıllarǵa mólsherlengen sud tarawın sıpat tárepinen jańa basqıshqa alıp shıǵıwdıń qısqa múddetli STRATEGIYaSÍ» tastıyıqlandı.

Usı Strategiyada sudlardıń bir qatar tiykarǵı wazıypaları belgilenip, bul wazıypanıń biri Ádil sudlaw sıpatın túpten asırıw bolıp esaplanadı.

Yaǵnıy, sudlarda is júritiw sapasın elede asırıw ilájlerin kóriw, Joqarǵı sud instanciyalarınıń sud qararların qayta kóriwde sanlı texnologiyalardan paydalanıw imkániyatların keńeytiriw, xalıq ushın túsinikli hám qolay, sonday-aq tómengi sud instanciyaları qátelerin óz waqtında tuwırlawǵa kómek beriwshi mexanizmlerdi jolǵa qoyıw, Aymaqlarda xalıq sanınan kelip shıǵıp, sudyalıq shtat birlikleri sanın basqıshpa-basqısh asırıp barıw, Sudyalardıń qániygelesiwi talap etiletuǵın túrdegi isler boyınsha qániygelestirilgen sudyalar korpusın keńeytiriw ilájlerin kóriw,

Sud islerin kóriwde birden-bir sud ámeliyatın támiyinlew ushın zárúr bolǵan ilájlerdi kóriw boyınsha wazıypalar belgilendi.

Bunnan tısqarı, sud processleri hám sud qararları júzesinen jámiyetshilik arasında tuwrı hám qalıs pikirlerdi payda etiw boyınsha – sudlar iskerligi menen baylanıslı túrli dereklerden járiyalanǵan qalıs bolmaǵan hám bir tárepleme berilgen maǵlıwmatlar boyınsha tezlik penen múnásiybet bildiriwdi jolǵa qoyıw belgilenbekte.

Bul wazıypalar puqaralar hám yuridikalıq shaxslar arasında, ásirese xalıq arasında sudlardıń abıroyın túsiriwge qılınǵan háreketlerdiń aldın alıwǵa, olardıń sudlarǵa bolǵan isenimin elede kúsheytiriwge járdem beredi.

Nókis rayonlar aralıq hákimshilik sudı baslıǵı: B.Dosımbetov