Shomanay rayonı “Begjap” APJ “Gúlistan” awılında rayonlıq Keńes deputatı M.Esengeldiev óz saylawshıları menen ushırastı.

Ushırasıwda Ózbekstan XDP Qaraqalpaqstan Respublikalıq Keńesi baslıǵınıń orınbasarı N.Ganiev, rayondaǵı mákeme hám shólkemlerden tiyisli qánigeler, ǵalaba xabar quralları wákilleri qatnastı.
Xalıq deputatları Shomanay rayonlıq Keńesi deputatı M.Esengeldiev saylawshılarǵa 2022-jılda ámelge asırǵan deputatlıq iskerligi haqqında esabat berdi.

Atap aytqanda, 2022-jılda rayonlıq Keńes tárepinen ótkerilgen sessiya májilislerinde tolıq qatnasqan, sonıń menen birge óz saylaw okruginde 12 mártebe saylawshılar menen ushırasıwlar ótkergen. Ushırasıwlar dawamında saylawshılar tárepinen 35 mártebe múrájatlar kelip túsken bolıp, bul múrájatlar tiyisli tártipte úyrenilip shıǵılıp unamlı sheshiliwine erisilgen. Saylawshılar múrájatları tiykarında jergilikli hákimiyat hám basqarıw organlarınıń lawazımlı shaxslarına 10 deputatlıq sorawların jibergen.
Bunnan tısqarı deputat M.Esengeldievtiń jeke baslaması menen 4-«Tashkent» saylaw okrugi aymaǵındaǵı ishki jollardı ońlaw hám jańadan qurıw boyınsha «Ashıq byudjet» málimleme portalına (https://openbudget.uz) usınıs kiritiw arqalı «Gúlistan» awılındaǵı Ustaz kóshesine bahası 300,0 mln.sumlıq 1 km, «Baymaqlı awıl» kóshesine bahası 147,2 mln.sumlıq 0,46 km, «Adolat» kóshesine bahası 487,5 mln.sumlıq 1,5 km hám «Kóksuw» awılındaǵı bahası 288,0 mln.sumlıq 0,9 km ishki jollar jańadan qurıldı.
Ushırasıw dawamında Ózbekstan XDP Qaraqalpaqstan Respublikalıq Keńesi baslıǵınıń orınbasarı N.Ganiev tárepinen Ózbekstan Respublikası Prezidentiniń 2022-jıl 20-dekabr kúngi Oliy Majliske hám Ózbekstan xalqına jollaǵan Múrájatnaması haqqında puqaralarǵa túsinik berdi.
Ushırasıw sońında deputat M.Esengeldiev tárepinen jeke qabıllaw ótkerilip, saylawshılardıń múrájatları qabıllandı.

Shomanay rayonı hákimligi málimleme xızmeti.