Sońǵı jıllarda elimizde isbilermenlik tarawına ayrıqsha dıqqat-itibar qaratılıp, onı rawajlandırıw ekonomikalıq siyasattıń áhmiyetli baǵdarlarınıń biri etip belgilendi.

Xalıqtı isbilermenlikke tartıw,salamat básekilikti kúsheytiw, solay etip, biznes ortalıqtı jaqsılaw boyınsha bir-qansha ilajlar ámelge asırılmaqta. «Hár-bir shańaraq isbilermen» baǵdarlaması arqalı isbilermenlik penen shuǵıllanıwdı maqset etken puqaralardı qollap-quwatlaw nátiyjesinde jańadan shólkemlestirilgen subektlerdiń sanı kóbeydi. Lekin, orınlarda byurokratiya, dámegóylik hám isbilermenlik jumısına tosqınlıq etiw jaǵdayları elege shekem ushıraspaqta.

Bul mashqalalardı sistemalı sheshiw, isbilermenlerge járdem beriw maqsetinde 2019-jıl, 14-mayda Ózbekstan Respublikası Prezidentiniń «Isbilermenlik jumısın qollap-quwatlaw hám qorǵaw sistemasın túp-tiykarınan jetilistiriw ilajları haqqında»ǵı Pármanı qabıl etildi. Pármanǵa muwapıq, Ózbekstan Respublikası Bas ministriniń Isbilermenlerdiń múrájatların kóripshıǵıw ushın qabıllawxanaların shólkemlestiriw belgilengen. Bul arqalı isbilermenlik subektlerin qorǵawdıń huqıqıy mexanizmlerin elede kúsheytiw, sırt elli investorlardıń múrájatları menen islesiwdi shólkemlestiriw, ashıq-aydın sóylesiwin támiyinlew, sheshimi tabılmaǵan máselelerdi sheshiw ushın óz waqtında nızamlı sharalar kóriw maqset etip qoyılǵan.

Nátiyjede qabıllawxanalar ashılıp, Ózbekstan Respublikası Ministrler Kabineti strukturasında Bas ministrdiń Isbilermenlerdiń múrájatların kórip shıǵıw qabıllawxanalarınıń jumısın shólkemlestiriw hám muwapıqlastırıw sekretariatı shólkemlestirildi. Sonday-aq, Qaraqalpaqstan Respublikası, wálayatlar hám Tashkent qalasında isbilermenlerdiń qabıllawxanalarınıń ashılıwı belgilep berildi hám bular boyınsha jumıslar alıp barılmaqta.

Qabıllawxanalarda isbilermenlerdi, sırt el investorların qabıl etiw, hákimlikler, Sawda-sanaat palatasınıń isbilermenlikke kómeklesiw orayları, investorlar hám sawda, ádillik, salıq inspekciyası, qurılıs, mámleketlik kadastr uyımları, bank hám basqada shólkemlerdiń aymaqlıq uyımları wákilleriniń qatnasıwında tastıyıqlanǵan keste boyınsha hár kúni nátiyjeli jumıslar ámelge asırıladı. Eger múrájatlarda kórsetilgen nızamlı talaplar hám usınıslardı rayon hám qala dárejesinde sheshiw hám qanaatlandırıw imkaniyatı bolmasa Qaraqalpaqstan Respublikası, wálayatlardıń Isbilermenlerdiń múrájatların kórip shıǵıw qabıllawxanalarına jiberiledi. Bunnanda nátiyje shıqpasa, Ministrler Kabineti sekretariatında, Biznes ombudsman, Sawda-sanaat palatasınıń wákillikli uyımlarınıń qatnasıwında kóriledi. Al, bunda da sheshim tabıw qıyın bolsa, Bas ministrdiń tikkeley ózi qabıllap, múrájattı úyrenedi.

 Shomanay rayonı statistika bólim jetekshi qániygesi: F.Bekimbetov