Búgingi kúnde mámleketimizde jaslarǵa degen itibar júda joqarı dárejede. Atap aytqanda, joqarı oqıw orınlarına kiriwdegi imkániyatlar, qalaberse, ayrım joqarı oqıwlarda oqıp bilim alıp atırǵan jaslarımızdıń tólemli shartnama pullarınıń mámleket esabınan tólep beriliwi, sonday-aq, isbilermenlikke qızıǵıwshı jaslarǵa bir-qansha jeńilliklerdiń jaratılıwı, bulardıń barlıǵı keleshegimiz bolǵan jaslardıń jetik maman qánigeler bolıp jetisiwi, ilimli-bilimli insanlar bolıp keleshekte ómir sınaqlarınan súrinbey alǵa ilgerlewleri ushın imkániyatlar esigi esaplanadı.
Mámleketimizde jaratılıp atırǵan imkániyatlardan paydalanıp, úlken jetiskenliklerge erisip atırǵan jaslarımızdıń barlıǵı quwanarlı.
Biraq, degen menen aramızda bilip-bilmey jınayat jolına kirip qalǵan jaslarda ushırasadı. Atap aytqanda, jınayat isleri boyınsha Ellikqala rayon sudı tárepinen 2022-jıl 3-oktyabr kúni kórip shıǵılǵan jınayat isi waqıyası bunıń ayqın dálili boladı. 2004-jıl 10-dekabr kúni tuwılǵan er jetpegen A.T 2022-jıl 17-iyun kúninen 18-iyun kúnine óter keshesi qadaǵalawshı ata-anasınıń joqlıǵı, sonday-aq oqıw yamasa jumıs penen bant bolmaǵanlıqtan Ellikqala rayonında jaylasqan E.T ǵa tiyisli bolǵan azıq-awqat dukanına jasırın túrde kirip jámi 2.mln.246.mın sumlıq azıq-awqat ónimlerin urlıq jolı menen alıp shıǵıp waqıya jayınan jasırınǵan.
Bul jınayat izleri huqıq qorǵaw uyımları tárepinen anıqlanıp onın qarsısına jınayat kodeksiniń tiyisli statyası menen jınayatlı isi qozǵatılıp tergew háreketleri alıp barılıp atırǵan bir waqıtta er jetpegen A.T qayta jınayat islew jolına ótip oziniń tanısı er jetpegen B.A menen jınayıy til biriktirip Ellikqala rayonı Aqshakól APJ aymaǵında jasawshı puqara M.A nıń mal qorası atirapına baylap qoyǵan bahası 8.mln. sumlıq bir bas qara malın hesh kimge bildirmesten túngi waqıtta urlap alıp kelip, ertesi kúni qarıydar tawıp satıwdı rejelestirip qoyǵan jerinde huqıq qorǵaw uyımı xızmetkerleri tárepinen qolǵa alınǵan. Is penen tanısar ekensiz bul jaslardın birinshi mártebe bul urlıq yamasa basqada unamsız háreketlerdi islep atırǵanlıǵına isengin kelmeydi.
Sebebi, ele on segiz jasqa tolmaǵan jas ospirim A.T nıń tergew háreketlerine barıp islegen is-háreketleriniń jámietlik qáwipli háreket yaǵnıy jınayat ekenligin ańlaǵan halda bunday is-háreketlerge qayta qol urıwı har qanday adamdı oylandırıwı sózsiz.
Albette, sud tárepinen bul jaslarǵa nızamlı jazaları berildi, degen menen jámietimizde jaslardı jazalaw menen emes, olardı paydalı miynet penen shuǵullanıwı ushın sharayat jaratıw, sonday-aq olardı ózleri qızıqqan tarawları boyınsha oqıwǵa yamasa jumısqa tartıw arqalı tarbiyalasaq jınayatshılıqtıń erte aldın alıwǵa xızmet qılıwı sózsiz.

Jınayat isleri boyınsha
Ellikqala rayon sudı baslıǵı O.J.Maulenov