Shomanay rayonı Mádeniyat bólimi janındaǵı Háweskerlik Xalıq teatrı jámááti tárepinen Ózbekstan Respublikası Prezidentiniń 2022-jıl 2-fevraldaǵı “Mádeniyat hám kórkem-óner tarawıń rawajlandırıwǵa baylanıslı qosımsha ilajlar haqqında”ǵı , 2018-jılı 28-noyabrdegi “Ózbekstan Respublikasında milliy mádeniyattı elede rawajlandırıw haqqında”ǵı PQ-4038-sanlı qararınıń orınlanıwı hám de jıl basınan dúzilgen rejege tiykarlanıp, Respublikamızǵa belgili kórkem-óner xızmetkerleri menen ushırasıw keshesi shólkemlestirildi.

Keshege Ózbekstan Respublikasında xızmet kórsetken artist Maryash Ismailova, Qaraqalpaqstan Respublikasında xızmet kórsetken artist Bazarbay Nazarımbetov, Ózbekstan mámleketlik kórkem-óner hám Mádeniyat institutı Nókis filialı oqıtıwshısı docent Liza Orazımbetova hám Ajiniyaz Utepbergenovlar miymanda boldı. Keshe dawamında kelgen miymanlar oqıwshılarımızǵa basıp ótken miynet jolları, ustazları, shákirtleri, hám erisken jetiskenlikleri haqqında aytıp ótti. Sonday-aq, mektep oqıwshıları ózleriniń qızıqtırǵan sorawlarına juwaplar aldı.

Bunnan soń, PQ-4038-sanlı qararındaǵı “Ustaz-shákirt” dástúriniń orınlanıwı boyınsha bólimdegi Háweskerlik Xalıq teatr jámááti aǵzaları hám 13-sanlı Balalar muzika hám kórkem-óner mektebi teatr óneri toparı aǵzaları menen birgelikte sheberlik sabaǵı ótkerildi.

Keshe sońında Mádeniyat bólimi xızmetkerleri hám dógerek qatnasıwshılarınıń koncert baǵdarlaması jánede Balalar muzika hám kórkem-óner mektebi teatr óneri toparı aǵzaları tárepinen tayarlanǵan K.Matmuratovtıń “Ómirbek hám tazsha” spektaklinen úzindiler qoyıp berildi. Ushırasıw jıynalǵan tamashagóyler hám oqıwshı jaslarımız kewlinde úlken tásirler qaldırdı.

Shomanay rayonı hákimligi málimleme xızmeti