Oq atar quralların hesh qanday hújjetsiz, nızamsız saqlaw jınayat ekenligi tuwralı úgit-násiyat hám túsinik jumısları pútkil elimiz boylap keń túrde júrgizilmekte.

Tilekke qarsı, ayırım puqaralar elege shekem oq atar quralların nızamsız saqlap jınayat juwapkershiligine tartılmaqta.
Shomanay rayonı turǵını B.N. isimli puqara aw mıltıǵın hújjetsiz, nızamsız túrde saqlaǵanı ushın isi sudta qaralıp, jınayat juwapkershiligine tartıldı.
B.N. Shomanay rayonında tuwılǵan. Ol 2014-jılı qaytıs bolıp ketgen ákesinen qalǵan aw mıltıǵın hesh qanday hújjetsiz usı kúnge shekem saqlap kelgen.
Bul isi menen puqara B.N. Ózbekstan Respublikası Jınayat kodeksiniń 248-statyası 1-bóliminde kórsetilgen jınayattı keltirip shıǵarǵan.
Nızamsız túrde oq atar qural saqlaǵanı ushın bul puqaraǵa nızamǵa muwapıq tiyisli jaza sharası qollanıldı hám oq atar quralı ayǵaqlı zat retinde alınıp, saplastırıw ushın tiyisli orınǵa tapsırıldı.
Eger bul puqara ákesinen qalǵan aw mıltıǵın óz waqtında ishki isler uyımına tapsırǵanda jınayat juwapkershiligine tartılıw ornına mámleketten sıylıq pulı alǵan bolar edi.
Óz erki menen oq atar quralın tapsırǵan hár bir puqara juwapkershilikten azat etilip, pullay sıylıq alıwǵa miyassar boladı. Saqlawlı turǵan oq atar quralı bolsa óz erkińiz benen huqıq qorǵaw uyımlarına tapsırıwdı usınıs etemiz.
Jınayat isleri boyınsha
Shomanay rayon sudı baslıǵı R.Nazarov