Búgingi kúni elimizde transportlar sanınıń artıwı menen jollarımızda jol transport qaǵıydaların buzıw hádiyseleri kóbeyip barmaqta. Álbette, bul pútkil jámiyetimiz ushın ashınarlı jaǵday bolıp, onnan respublikamızda jasawshı hár bir puqara ózlerine tiyisli juwmaq shıǵarıwı tiyis. Eger, ózlerimiz tikkeley gúwası bolıp yáki ǵalaba xabar quralları arqalı járiyalanıp atırǵan materiallardan juwmaq shıǵarıp, jol tártibi qaǵıydalarına ámel etpesek, turmısımızda baxıtsız hádiyseler sanı arta beredi.
1984-jılı tuwılǵan Ellikqala rayonı turǵını A.Ya. da usınday itibarsız puqaralardıń biri bolıp, ol 2022-jıldıń 25-yanvar kúni saat 8-30 lar shamasında óziniń basqarıwındaǵı puqara K.R. ǵa tiyisli «Neksiya-2» avtomashinasın hesh qanday hújjetsiz rayondaǵı Nawayı awıl puqaralar jıyını aymaǵınan ótiwshi «Qızılqala-Bostan-Gúldirsin-Tórtkúl» jolı boylap qubladan arqaǵa qaray háreketlenip kiyatırıp, ózine qarama-qarsı háreketlenip kiyatırǵan puqara A.N. ǵa tiyisli «Lasseti» marqalı avtomashina menen soqlıǵısıp ketedi.
Júz bergen bul jol transport hádiysesi nátiyjesinde, «Neksiya-2» avtomashinasında jolawshı sıpatında kiyatırǵan puqara X.D. awır dene jaraqatın alıp, waqıya bolǵan jerde ózine kelmesten qaytıs boladı.
Al, «Lasetti» avtomashinasınıń basqarıwshısı N.A., jolawshılar B.A., O.S., erjetpegen balalar B.H., J.S, M.S. lar dene jaraqatın alıp, Ellikqala rayonlıq medicinalıq birlespesine kelip túsedi hám 31-yanvar kúni kórsetilgen tez medicinalıq járdemge qaramastan emlewxanada kóz jumadı.
Baxıtsız hádiysege ushıraǵan qalǵan jolawshılardıń ómiri bolsa, medicina xızmetkerleriniń alıp barǵan pidayı xızmetleriniń nátiyjesinde aman saqlanıp qalınadı.
Bul jol transport hádiysesi boyınsha toplanǵan jınayat isi Jınayat isleri boyınsha Ellikqala rayonlıq sudı tárepinen hár tárepleme kórip shıǵılıp, sudlanıwshı A.Ya.ǵa Ózbekstan Respublikası Jınayat kodeksiniń tiyisli statyaları tiykarında jaza tayınlandı.
Juwmaq ornında sonı aytıp ótiwimiz kerek, hár bir insan ushın onıń ómiri biybaha. Onı abaylap saqlaw biziń hárbirimizdiń ádiwli wazıypamız bolıwı lazım.
O.Mawlenov,
Jınayat isleri boyınsha Ellikqala rayonlıq sudınıń baslıǵı.