Usı jıldıń 15-iyun kúni Ózbekstan Xalıq demokratiyalıq partiyası Qaraqalpaqstan Respublikalıq Keńesi baslaması menen Shomanay rayonında “Meniń konstituciyam” atamasında ushırasıw bolıp ótti.

Ushırasıwdı Xalıq deputatları Shomanay rayonlıq Keńesi Sekretariatı baslıǵı, rayonlıq Keńes deputatı M.Esengeldiev ashtı hám alıp bardı.
Sonday-aq, ushırasıwda Ózbekstan XDP Qaraqalpaqstan Respublikalıq Keńesi baslıǵınıń orınbasarı N.Ganiev, Xalıq deputatları Shomanay rayonlıq Keńesindegi Ózbekstan XDP deputatlıq toparı aǵzaları, partiyanıń rayonlıq Keńesi, ádillik bólimi, rayonlıq Xalıqtıń bántligine kómeklesiw orayı, baslanǵısh partiya shólkemleri baslıqları, partiya belsendileri hám de ǵalaba xabar quralları wákilleri qatnastı.
Ushırasıwda dáslep, N.Ganiev, rayonlıq ádillik bóliminen B.Utemuratov, rayonlıq Keńes deputatları B.Sagatov, Q.Jaqsımuratova hám Z.Qaypovalar sózge shıǵıp búgingi abadan turmısımızdıń kepili bolǵan Konstituciyamız jańa mámleket, jańa jámiyet qurıw, jańadan-jańa imkaniyatlar jaratıwshı tariyxıy hújjet sıpatında qádirlenip, onıń qabıl etiliwi menen jámiyetlik hám mámleketlik qurılıstıń barlıq tarawlarındaǵı qatnasıqlardı, nızamshılıǵımızdıń barlıq tarawların tártipke salıwshı huqıqıy sistema jaratılǵanlıǵı haqqında atap ótti.
Sonday-aq ushırasıwda Ózbekstan XDP Qaraqalpaqstan Respublikalıq Keńesi baslıǵınıń orınbasarı N.Ganiev Ózbekstan Respublikası Konstitutsiyasına ózgeris hám qosımshalar kirgiziw boyınsha usınıslardı qáliplestiriw hám shólkemlestiriw ilajların ámelge asırıw boyınsha Konstituciya komissiyası tárepinen usı jıldıń 24-may sánesinen baslap keń jámáátshilikten usınıs hám pikirler jıynap atırǵanlıǵı, usı processte partiya tárepdarları da belsendi qatnasıp, óz pikir usınısların beriwge shaqırdı.
Sonıń menen birge, Xalıq demokratiyalıq partiyasındaǵı Konstituciyaǵa ózgeris kirgiziw boyınsha Isshi toparlarına kelip túsken usınıslar haqqında maǵlıwmatlar berildi.

Shomanay rayonı hákimligi málimleme xızmeti.