Bıyılǵı Ǵálle-2022 orım-jıyını mapazında Shomanay rayonı aymaǵında egilgen biyday ónimin óz waqtında talapatsız jıynap alıw, ǵálle dalalarında hám ǵálleni saqlaw orınlarında órt qáwipsizligin támiyinlew maqsetinde mapazǵa qatnasıwshı orım kombaynlarınıń sazlıǵı, olardıń birlemshi órt óshiriw quralları menen tolıq támiyinlengenligi boyınsha Shomanay mashina traktor parkinde bolǵan 8 orım kombaynları kórikten ótkerildi.

Kórikten ótkeriw dawamında kombaynlar operator basqarıwshıları hám de biyday ónimin tasıwshı avtomobil basqarıwshıları instruktajdan ótkerilip, olarǵa máwsim dawamında órt qáwipsizligin támiyinlew barısında túsinikler berildi.
Hár jılǵıday ǵálle jıyın-terimi máwsimi álbette juwapkershilikli máwsim esaplanadı. Ǵálle jıyın-terimi máwsiminde biybaha ırısqı-nesiybemiz bolǵan biyday ónimin óz waqtında jıynap alınıwı hám qırmanlarǵa jetkizip beriliwinde jankúyerlik kórsetiwi lazım. Házirgi waqıtta tiyisli taraw xızmetkerleri menen bir qatarda Ayrıqsha jaǵdaylar bólimi xızmetkerleri ushında bul máwsim óte juwapkershilikli máwsim esaplanadı.
Sonlıqtan bıyılǵı Ǵálle-2022 orım-jıyını mapazına qatnasıwshı orım kombaynlardıń sazlıǵına itibar qaratılıp, olardıń aydawshı operatorları menen órt qáwipsizligin támiynlew maqsetinde instruktaj ótkerildi.

Álbette ǵállezarlardı órtten qorǵawda bir qansha tómendegi órt qáwipsizligi qaǵıydalarına qatań ámel qılıwımız kerek:
-ǵálle maydanlarınıń hár 50ga arasınan 8 metr keńlikte jer shúdigarlanıp koyılıwı,
-ǵálle maydanlarında jıyın-terimge qatnasıp atırǵan hár bir kombaynda 2 dana, ǵálleni tasıwshı transportlarda bolsa, 1 danadan OP5 markalı órt sóndirgish bolıwı, sonıń menen birge kombayn hám transportlar ushqın óshirgish, qum, shelek hám belkúrekler menen támiyinlengen bolıwları tiyis.
-kombayn, traktor hám avtomabillerge janar may quyıw ushın ǵálle maydanınan keminde 150 metr wzaqlıqta arnawlı janar may quyıw orınların tayarlaw maqsetke muwapıq,
-ǵállezarlarǵa jaqın jerde ashıq órtten paydalanıw qatań qadaǵan etiledi,
Dán qabıl qılıw punktleri, qırmanlar hám dán saqlaw, qayta islew beriw kárxanaları órt qáwipsizligi qaǵıydalarına qatań ámel qılıwları lazım,
Bul orınlarda órtke qarsı suw háwizleri saz halǵa keltirilip, jeterli muǵdarda suw menen támiyinleniwi, órt óshiriw texnikaları hám áspab-úskeneler jawıngerlik halda bolıwı, ǵálle qırmanları arasında transportlar ushın jeterli dárejede ashıq jollar kaldırılıwı tiyis. Sonday-aq, isshi xızmetkerler órt qáwipsizligi boyınsha instruktajdan ótkeriliwi, zárur waqıtta órt óshiriw áspab qurallarınan paydalanıp biliwleri shárt.
Dán qabıl qılıw punktleri, qırmanlar hám dán saqlaw, qayta islew beriw kárxanalarında kepserlew jumısları hám ashıq órt penen baylanıslı basqa jumıslar sol jerdegi órt qáwipsizligi xızmetinin arnawlı ruxsatnaması arqalı alıp barıladı.
Áziz Watanlaslar!! Ǵálle bul ırısqı-nesiybemiz, dasturxanımız kórki, xalqımızdın abadan turmısı nan menen. Solay eken diyxanlarımızdıń mashaqatlı miyneti arqalı jetistirilgen ǵálle ónimin nabıt qılmay jıynap terip alıw hám asıraw hár birimizdin insanıylıq wazıypamız bolıp esaplanadı.

Shomanay rayonı Ayrıqsha jaǵdaylar bólimi baslıǵı orınbasarı kapitan G.T.Rejepov