Pedagog kadrlardı attestaciyadan ótkeriw hám olarǵa mamanlıq kategoriyasın beriw boyınsha hújjetlerdi qabıl etiw 2022-jıl 1-yanvardan baslap pedagog kadrlar tárepinen  hár jılı 1-yanvardan 1-martqa hám 1-avgusttan 1-oktyabrǵa shekem Mámleketlik xızmetler orayları arqalı yaki birden-bir interaktiv mámleketlik xızmetler portalı yaki Bilimlendiriw inspekciyasınıń rásmiy veb-saytında dizimnen ótiw arqalı qabıl etiliwi ámeliyatqa engizildi.

Bunda pedagog kadrlarǵa qaǵaz kórinisindegi attestaciyadan ótkenligi haqqındaǵı sertifikat beriw biykar etilip, elektron sanlı imza menen tastıyıqlanǵan hám QR-kod qoyılǵan elektron kórinistegi sertifikat beriw tártibi jolǵa qoyıldı. Pedagog kadrlardı náwbettegi májbúriy attestaciyadan ótkeriw boyınsha mámleketlik xızmeti kórsetilgenligi ushın jıyım óndirilmeydi. Egerde pedagog kadrlardı náwbetten tısqarı attestaciyadan ótkeriw boyınsha mámleketlik xızmetin kórsetiw ushın bazalıq esaplaw muǵdarınıń 1 esesi muǵdarında jıyım óndiriledi.

Attestaciyaǵa tómendegi hújjetler qosımsha etiledi:

-pedagog kadrlardıń bilimlendiriw haqqındaǵı hújjeti (shet mámleketlerde bilim alǵanlıq haqqındaǵı -hújjettiń Ózbekstan Respublikasında tán alıw haqqındaǵı guwalıq;

-qayta tayarlaw kurslarınan ótkenligi haqqında diplom nusqası (eger bar bolsa);

-pedagog kadrdıń pedagogik qábileti hám psixologik tayarlıǵın bahalaw nátiyjeleri maǵlıwmatnaması.

Bilimlendiriw inspekciyası tárepinen pedagog kadrlardıń oqıw páni boyınsha mamanlıq sınawların ótkeriw kestesi hár jılı 10-mart hám 10-oktyabrge shekem tastıyıqlanadı, Bilimlendiriw inspekciyasınıń rásmiy veb-saytında járiyalanadı, tiyisli ministrlikler hám mákemelerge hámde SMS–xabarnama arqalı pedagog kadrlarǵa jiberiledi.

Pedagog kadrlardı attestaciyadan ótkeriw 2 basqıshta ámelge asırıladı hám de 2 basqısh boyınsha ulıwma 100 ballıq sistemada bahalanadı. Birinshi basqıshta pedagog kadrlardıń pedagogik qábileti hám psixologik tayarlıǵı bilimlendiriw shólkeminiń pedagogik keńesleri tárepinen úyreniledi hám 20 ballıq sistemada bahalanadı.

Ekinshi basqıshta pedagog kadrlardıń oqıw páni boyınsha mamanlıq sınawları ótkeriledi.

Mamanlıq sınawları tómendegi formalardıń biri boyınsha ótkeriledi: test sınawları, dóretiwshilik, teoriyalıq, (awızeki, jazba) hám ámeliy.

Eki basqısh nátiyjelerine kóre:

1. a) joqarı mamanlıq kategoriyası 80 baldan joqarı bolsa, attestaciyadan ótken, mamanlıq kategoriyası saqlanǵan, 80 baldan kem kórsetkishke iye bolsa-attestaciyadan ótpegen, mamanlıq kategoriyası túsirilgen;
2. b) birinshi mamanlıq kategoriyası 80 ball hám onnan joqarı kórsetkishke iye bolsa-attestaciyadan ótken, joqarı mamanlıq kategoriyası berilgen, 70 baldan 79- balǵa shekem-attestaciyadan ótken, birinshi mamanlıq kategoriyası saqlanǵan, 70 baldan kem bolsa-attestaciyadan ótpegen, mamanlıq kategoriyası túsirilgen;
3. v) ekinshi mamanlıq kategoriyası 70 ball hám onnan joqarı kórsetkishke iye bolsa, attestaciyadan ótken, birinshi mamanlıq kategoriyası berilgen, 60 baldan 69 balǵa shekem kórsetkishke iye bolsa-attestaciyadan ótken ekinshi mamanlıq kategoriyası saqlanǵan, 60 baldan kem bolsa-attestaciyadan ótpegen, qánige lawazımına túsirilgen;
4. g) qánige yaki joqarı maǵlıwmatlı oqıtıwshı lawazımındaǵı pedagog kadr 60 ball hám onnan joǵarı kórsetkishke iye bolsa- attestaciyadan ótken, ekinshi mamanlıq kategoriyası berilgen, 55 baldan 59 balǵa shekem-attestaciyadan ótken qánige lawazımı saqlanǵan, 55 baldan kem kórsetkishke iye bolsa-attestaciyadan ótpegen, qánige lawazımına ılayıq emes dep esaplanadı.

Bilimlendiriw shólkemleriniń tómendegi pedagog kadrlarına mamanlıq kategoriyası tuwrıdan tuwrı (attestaciyadan ótkerilmesten) beriledi:

-rayon (qala) kólemindegi sport jarıslarınıń birinshi orın iyelerin tayarlaǵan bilimlendiriw mákemeleri dene tárbiya páni oqıtıwshılarına- ekinshi mamanlıq kategoriyası (úlken oqıtıwshı lawazımı);

-Qaraqalpaqstan Respublikası, walayatlar hám Tashkent qalası kólemindegi sport jarıslarınıń birinshi orın iyelerin tayarlaǵan bilimlendiriw mekemeleri dene tárbiya páni oqıtıwshılarına- birinshi mamanlıq kategoriyası (jetekshi oqıtıwshı lawazımı);

-xalıqaralıq  hámde respublika kóleminde sport jarıslarınıń birinshi, ekinshi hám úshinshi orın iyelerin tayarlaǵan bilimlendiriw mákemeleri dene tárbiya páni oqıtıwshılarına- joqarı mamanlıq kategoriyası (bas oqıtıwshı lawazımı);

-xalıqaralıq matematika (IMO), fizika (IPhO), ximiya (IChO), biologiya (IBO), informatika (IOI) olimpiyadalarında altın,  gúmis yaki bronza medal (birinshi, ekinshi hám úshinshi orın) iyelerin tayarlaǵan bilimlendiriw mákemesiniń pedagog kadrlarına joqarı mamanlıq kategoriyası (bas oqıtıwshı lawazımı).

T.Dawletmuratov. Shomanay rayonı Mámleketlik xızmetler orayı bas qánigesi.