BALALARDÍŃ QUWANÍShÍ ShEKSIZ
Sońǵı jıllarda mámleketimiz tárepinen bilimlendiriw tarawın rawajlandırıw ushın ayrıqsha itibar qaratlmaqta. Elimizdegi bárshe mektep imaratları izbe-iz rekanstrukciyalanıp, jańa inventarlar, joqarı tezliktegi internet penen támiyinlenbekte.

Jáne bir ayta ketetuǵın quwanıshlı xabar, endigiden bılay Qaraqalpaqstan Respublikası hám Xorezm wálayatındaǵı 1-4-klass, yaǵnıy baslanǵısh klass oqıwshılarına biypul awqat (azanǵı hám túski) beriledi. Bul Prezidentimiz tárepinen 2022-jıl 28-yanvar kúni qabıl etilgen PP-60-sanlı Pármanında ayrıqsha kórsetip ótilgen.
Búgin Shomanay rayonı aymaǵındaǵı bárshe mekteplerdiń baslanǵısh klass oqıwshılarına biypul awqatlar berilip baslandı.

Maǵlıwmat ushın, shomanay rayonında jámi ulıwma bilim beriw mektepleriniń sanı 33 bolıp, bul mekteplerde baslanǵısh klass oqıwshılarınıń sanı 3 134 ti quraydı.
– Bul baslama ósip kiyatırǵan jas áwladtıń durıs awqatlanıwı hám salamatlıǵına unamlı tásirin tiygizeri sózsiz. Bilimlendiriw tarawına qaratılıp atırǵan bunday itibardan biz hám mektep oqıwshıları júdá minnetdarmız, – deydi 7-sanlı ulıwma bilim beriw mektebi direktorı T.Qallıqılıchova.
Shomanay rayonı hákimligi málimleme xızmeti