Júz beriwi múmkin bolǵan Ayrıqsha jaǵday, iyis gaziniń qáwpi, órtlerdiń aldın alıw wazıypaların atqarıp atırǵan Shomanay rayonı Ayrıqsha jaǵdaylar bólimi xızmetkerleri tárepinen rayon aymaǵındaǵı xalıq xojalıǵı obektleri hám puqaralardıń jeke menshik turaq jaylarında qáwipsizlik talaplarına muwapıq bolıwın támiyinlew maqsetinde bir qatar ilajlar júrgizilip atır.

Rayon aymaǵında jaylasqan tiyisli taraw wákilleri «Shomanay tumangaz» gaz tamiynatı, Shomanay elektr tarmaqları unitar kárxanası, suw xojalıǵı tamiynatı, Órtke qarsı gúresiw jámiyeti xızmetkerleri menen birgelikte, awılıq hám mákan puqaralar jıyınlarınıń aqsaqalları menen xalıq arasında, úgit-násiyat, profilaktikalıq jumıslardı shólkemlestirilip, puqaralardıń gaz hám elektr úskenelerinen durıs paydalanıwına itibar qaratıw boyınsha jumıslar alıp barılmaqta.

Ótken 2021-jıldıń 12 ayı dawamında rayon aymaǵında 10 orında órtler júz berip, yaǵnıy 3 orında puqaralar turaq jaylarında, 1 orında isbilermenlik subektlerinde, 2 orında avtomobillerde hám 4 orında puqaralardıń mal qoralarında órtler júz berip, usı órtler aqıbetinen puqaralarımızǵa 95,246,625 som  muǵdarında materiallıq zıyan jetkerdi.

Húrmetli puqaralar qıs máwsimi dawamında úylerimizdegi jılıtıw úskeneleri qazanxana (katyol) morılarınıń sazlıǵın óz waqtında tiyisli taraw qánigeleri tárepinen kórikten ótkeriwdi umıtpań. Itibarsızlıq aqıbetinde kelip shıǵıwı múmkin bolǵan hár qanday jaǵdaylardan saqlanıw maqsetinde turaq jaylarıńızda gaz úskenelerinen itibarlı bolǵan halda paydalanıń hám gaz úskenelerin tiyisli taraw xızmetkerleri tárepinen kórikten ótkeriń, gaz iyisin sezseńiz ayna hám esiklerdi ashıp xananı samallatıń hám gaz xızmetin shaqırıp saz xalatta bolıwın támiyinleń, jas balalardı úylerde jalǵız qaldırmań, joqarıdaǵı jaǵdaylar boyınsha sizlerdi sergeklikke shaqırıp qalamız.

Shomanay rayonı AJB baslıǵı orınbasarı

kapitan G.T.Rejepov