Usɪ jɪldɪń 1-25 noyabr kúnleri Ózbekstan Respublikasɪnɪń 4 aymaǵɪnda yaǵnɪy Ándijan wálayatɪnɪń Xojabat rayonɪ, Tashkent wálayatɪnɪń Joqarɪ Shɪrshɪq rayonɪ, Xorezm wálayatɪnɪń  Xiywa qalasɪnda hám de Tashkent qalasɪnɪń Jasnabat rayonɪnda xalɪqtɪ sɪnaw tárizinde dizimge alɪw ilaji ámelge asɪrɪldɪ.

Sɪnaw tárizinde xalɪqtɪ dizimge alɪw ilajɪ tómendegishe ótkerildi:

1-5-noyabr kúnleri— internet tarmaǵɪ arqalɪ xalɪqt dizimge alɪndɪ (5 kún);

6-10-noyabr kúnleri internet tarmaǵɪ arqalɪ dizimnen ótken respondentler hám olardɪń úy mánzilleri dizimi qáliplestirildi (5 kún);

11-22-noyabr ku`nleri   xalɪqtɪ dizimge alɪw  blankalarɪ tiykarɪnda úyme-úy júrgen halda xalɪq dizimge alɪndɪ (12 kún);

23-25-noyabr kúnleri hár bir esap uchastkasɪndaǵɪ turaq-jay mánzilleriniń 10 payızın tańlanba túrde qadaǵalaw  gúzetiwi  tiykarɪnda úyrenildi (3 kún).

Bul sɪnaw  tárizinde xalɪqtɪ dizimge alɪw, mámleketimiz ǵárezsizlikke eriskennen keyin xalɪqtɪ dizimge alɪw ilajlarɪ ótkerilmegenin esapqa alɪp tiykarǵɪ 2023-jɪlda ótkeriletuǵɪn xalɪqtɪ dizimge alɪw ilajɪna puqta tayarlɪq kóriw maqsetinde ámelge asɪrɪlmaqta.

Hár qanday mámlekettiń tariyxɪ – bul, birinshi náwbette, onda jasaytuǵɪn xalɪqtɪń tariyxɪ, xalqɪnɪń sanɪ hám quramɪ, onɪń ekonomikalɪq hám sosiyallɪq xarakterlerinde óz ańlatpasɪn tabadɪ. Xalɪq sanɪ boyɪnsha anɪq hám jámlengen maǵlɪwmatlar xalɪqtɪ dizimge alɪw ilajɪ tiykarɪnda alɪnadɪ.

Xalɪqtɪ dizimge alɪw juwmaqlarɪna qarap ótmish hám házirgi dáwir haqqɪnda oy-pikirler júritiw hám de keleshekti boljaw múmkin boladɪ.

Yaǵnɪy, xalɪqtɪ dizimge alɪw mámlekette jasawshɪ barlɪq adamlarǵa tiyisli bolǵan demografiyalɪq hám sosial-ekonomikalɪq maǵlɪwmatlardɪ jɪynaw, ulɪwmalastɪrɪw, bahalaw, analizlew  hám daǵaza etiwdiń birden-bir prosessin óz ishine alɪp, xalɪq haqqɪnda maǵlɪwmatlardɪń tiykarǵɪ dáregi esaplanadɪ. Aymaqlardɪ rawajlandɪrɪw hám jámiyettin` sosiallɪq qorǵawǵa mútáj qatlamlarɪna járdem kórsetiw boyɪnsha siyasiy hám basqarɪw qararlarɪn qabɪl etiw ushɪn zárúr maǵlɪwmatlardɪ alɪw imkániyatɪn beredi. Bul xalɪqtɪń sanɪn isenimli esaplaw, sonday-aq anɪq belgilep qoyɪlǵan birden-bir esapqa alɪw dáwirinde xalɪqtɪń jɪnɪsɪ, jasɪ, shańaraq jaǵdayɪ, maǵlɪwmatɪ, jasaw sharayatɪ, bántligi, milleti, puqaralɪǵɪ hám de basqada demografiyalɪq, sosial-ekonomikalɪq túrleri boyɪnsha jeke tártipte esapqa alɪw hám tolɪq táriyiplewdiń universal usɪlɪn iske túsirgen halda rásmiy statistika sistemasɪnda tiykarǵɪ rol oynaydɪ. Joqarɪda atap ótilgenindey, bizde jaqɪn 30 jɪldan aslam waqɪt dawamɪnda xalɪqtɪ dizimge alɪw ilajlarɪ ámelge asɪrɪlmadɪ. Bul óz gezeginde obektiv maǵlɪwmatlardɪ jɪynaw  hám sosial-ekonomikalɪq rejelerin anɪq rejelestiriw máselelerine keri tásir kórsetti. Yaǵnɪy, qay jerde hám qashan pútkúl xalɪqtɪ real qamtɪp alatuǵɪn emlewxana, mektep qurɪp pitkeriw, talaplarɪna sáykes qánigelikler tayarlaw sɪyaqlɪ sosiallɪq máseleler artqa tarta baslaydɪ.

Shomanay rayonɪ Statistika bólimi