2020-jıldıń 30-iyun kúni Ózbekstan Respublikası Prezidenti Sh.Mirziyoev basshılıǵında «ádil sudlawdı támiyinlew hám korrupciyaǵa qarsı gúresiw» baǵdarındaǵı wazıypalardı dodalawǵa arnalǵan videoselektor májilisi bolıp ótti.

Prezidentimiz májiliste sońǵı jıllarda sud sistemasında alıp barılıp atırǵan reformalar, ózgerisler, sonıń menen birge ádil sudlawdı ámelge asırıwǵa tosqınlıq etip atırǵan bir qatar faktorlarǵada toqtalıp ótti.

Óz bayanatında Prezidentimiz «Sud imáratına kelgen hár bir insan Ózbekstanda ádalat barlıǵına isengen halda shıǵıp ketiwi kerek. Bul Prezident talabı!»- dep qatań talap bildirdi.

Sonday-aq, Prezidentimiz óz bayanatında Sudyalar ǵáressizligin támiyinlew barısında da bir qatar máselelerge itibar qarattı.

Joqarı tájiriybeler hám halıqaralıq standartlar tiykarında, sud sistemasın “bir sud – bir instanciya” principi tiykarında qayta kórip shıǵılıwı kerekligi haqqında tapsırmalar berildi.

Bunda rayon (qala) hám wálayat sudları hám de Joqarǵı sud wákillikleri anıq shegaralanadı. Endilikte rayon (qala) sudlarında isler tek ǵana birinshi instanciyada, wálayatlarda – apellyaciya, Joqarǵı sudta bolsa kassaciya instanciyada kóriledi.

Bul óz gezeginde islerdiń uzaq múddette kóriliwiniń aldın alıp, Joqarǵı sudlar tárepinen hár qanday isti baqlaw tártibinde kórip, tómengi sudlarǵa tásir ótkeriwdey unamsız ámeliyatqa shek qoyadı, isbilermen hám investorlardıń sudpa sud júriwdey áweregershiliginiń aldı alınadı.

Yaǵnıy sudyalarǵa ádalatlı qarar qabıl etiwde basım ótkeriwge jol qoymaslıq maqsetinde Joqarǵa sud baslıǵı hám Bas prokurordıń baqlaw tártibinde protest keltiriw huqıqı alıp taslanıwı názerde tutılǵan.

Húrmetli Prezidentimiz «Sud jumıslarına aralasıwǵa hesh kimniń haqısı jok»!

Sudlardıń puqara hám isbilermenler paydasına shıǵarǵan qararları ushın birde bir lawazımlı shaxs sudlarǵa qarata basım ótkeriwge háreket qılsa, bul reformalarımızǵa qıyanet ekenligin aytıp ótti.

Endilikte sudyalardı wálayat, rayon (qala)daǵı sud jumısları menen baylanıslı bolmaǵan túrli jıynalıslarǵa biriktiriwge jol qoyılmaydı.

Bul sudlardın basqa islerge itibarların awdarmastan tek ǵana ádil sudlawdı ǵana ámelge asırıwı menen bánt bolıwınıń ayqın kórinisi ekenin bildiredi.

Mámleketimizde sud xám basqa huqıq qorǵaw tarawlarında alıp barılıp atırǵan bárshe reformalar mámleketimizde insan huqıqlarınıń qorǵalıwınıń haqıyqatında da joqarı dárejede ekenligin, qala berse Demokratiyalıq huqıqıy mámleket qurıp atırǵanımızdıń birden bir dáliyli bolıp tabıladı.

Qońırat rayonlar aralıq ekonomikalıq sudı baslıǵı Ayapov Alisher Sharapatdinovich