Mámleketimiz kóplegen ilimpaz hám alımlar besigin terbetken ullı mákan. Bul topıraqtan jetilisken ulamalar miyneti, dóretiwshiligi házirgi kúnge shekem dúnьya xalıqlarınıń mashqalalarına sheshim tawıp bermekte desek asıra aytqan bolmaymız. Ullı ata-babalar jaratqan aydın joldı dawam etip kiyatırǵan jas áwlad ta olarǵa ılayıqlı izbasar bolıwǵa xáreket etpekte.  Usı jıldıń sentyabrь-noyabrь ayları dawamında “Uzbekistan GTL” kompaniyası tárepinen joqarı oqıw orınları studentleri ushın arnawlı stipendiya járiyalandı.

Maǵlıwmat sıpatında sonı atap ótiwimiz kerek  GTL(“gas-to-liquids” yaki “Gazdı suyıqlıqqa aylandırıw”) kompaniyası Ózbekstan Respublikasınıń Qashqadárьya wálayatında jaylasqan bolıp, sintetik suyıq janılǵı islep shıǵarıwshı eń iri zavodlardan biri.

“GTL” kompaniyası tek ǵana Ózbekstan kóleminde emes bálki,  aymaqtaǵı eń iri investiciyalıq proektlerden biri bolıp tabıladı. Onıń qurılısı ushın 2,3 mlrd dollarlıq qárejet jumsalǵan. Zavodtıń islep shıǵarıw quwatı kúnine 37 000 barrelьdi qurap, GTL dizili, GTL kerosini (aviacion), GTL naftası hám suyıltırılǵan uglevodorod gazı sıyaqlı ónimlerdi islep shıǵaradı.

“Uzbekistan GTL” kompaniyacı tárepinen shólkemlestirilgen III stipendiya baǵdarlamasına mámleketimizdiń bir qatar Joqarı oqıw orınlarınan jámi 1700 den zıyat studentler, usılar qatarında Qaraqalpaq mámleketlik universitetinen 22 ziyrek student belsendi qatnastı. Búgingi kunde  usı baǵdarlama sheńberindegi tańlawdıń barlıq basqıshları juwmaqlanǵan bolıp, 10 student stipendiya baǵdarlamasınıń jeńimpazı bolıwǵa eristi. Jeńimpaz bolǵan jaslarımızdıń biri- Berdaq atındaǵı Qaraqalpaq mámleketlik universiteti Geografiya hám tábiyiy resurslar fakultetiniń Geodeziya, kartografiya hám tábiyiy resurslar kafedrası, neft hám gaz kánlerin iske túsiriw hám olardan paydalanıw qánigeliginiń 4-basqısh studenti Shomanay rayonında jasawshı Tajetdinov Muxammedti jetiskenligi menen qutlıqlay otırıp, oqıwlarında hám ilimiy izlenislerinde tabıslar tileymiz.

Geodeziya, kartografiya xám tábiyiy resurslar kafedrası assistent oqıtıwshısı E.Sanetullaev