Ózbekstan Respublikası Ministrler Kabinetiniń 2021-jıl 19-noyabrdegi 693-sanlı qararı menen «Kekseler hám mayıplıǵı bolǵan shaxslarǵa Sanatoriylerde emleniw ushın jollamalar beriw boyınsha mámleketlik xızmetler kórsetiw»diń hákimshilik reglamenti tastıyıqlandı.

Hákimshilik reglamentke kóre, 2022-jıl 1-iyuldan kekseler hám mayıplıǵı bolǵan shaxslarǵa sanatoriylerde emleniw ushın jollamadar tek ǵana Mámleketlik xızmetler orayı yaki Birden-bir interaktiv mámleketlik xızmetler portalı (my.gov.uz) arqalı beriledi.

Jollamalar tómendegi topardaǵı kekseler hám mayıplıǵı bolǵan shaxslarǵa beriledi:

-urıs mayıplarına hám qatnasıwshılarına teńlestirilgen shaxslar;

-qaytıs bolǵan áskeriy xızmetshilerdiń jańa nekeden ótpegen jesir hayalları (kúyewi);

-respublika áhmiyetine iye jeke pensiya alıwshı shaxslar;

-Chernobil AES avariyası aqıbetinde nurlanıw keselligine shalınǵan hám onı basınan keshirgen shaxslar, sonday-aq, Chernobil avariyası sebepli mayıp bolıp qalǵan shaxslar;

-yadro poligonları hám basqa radiaciya-yadro obektlerinde áskeriy xızmetti ótegen pensiya jasındaǵı shaxslar;

-I hám II topar mayıplıǵı bolǵan shaxslar, kózi ázzi I topar mayıbın gúzetip barıwshı shaxs;

-ózgeler kútimine mútáj jalǵız kekseler;

-jasqa baylanıslı pensiya alıwshılar.

Mámleketlik xızmetler kórsetilgeni ushın jıyım óndirilmeydi.

Jollamalar kekseler hám mayıplıǵı bolǵan shaxslarǵa 12 kúnge, jollamalardıń ámel etiw múddeti baslanıwınan 10 kún aldın  (tiykarlı sebeplerge kóre qaytarılǵan jollamalar bunnan tısqarı) beriledi.

Jollamalar tek ǵana olarda kórsetilgen múddetlerde haqıyqıy esaplanadı.

Jollamada kórsetilgen múddetten aldın sanatoriyǵa qabıl etilmeydi, sanatoriyǵa keshigip kelingen kúnler tiklenbeydi.

Jollamadan tek ǵana onda kórsetilgen shaxs ǵana paydalanıwı múmkin. Bir jollama menen birewden artıq adam (sonıń ishinde jas balalar da) qabıl etilmeydi.

Qararǵa kóre sonday-aq, “Elektron sanatoriy” platforması islep shıǵıladı.

Bunda:

-sanatoriylerge jollama alıw ushın múrájat etken xalıq elektron málimleme sisteması arqalı esapqa alınadı;

-jollamalar boyınsha náwbetti baqlap beriw imkaniyatın beriwshi mexanizmler engiziledi.

Shomanay rayonı Mámleketlik хızmetler orayı bas qániygesi T.Dawletmuratov