Háreketler strategiyasınıń ekinshi jónelisi, yaǵnıy nızam ústemligin támiyinlew hám sud-huqıq sistemasın jáne de reformalawda jınayatshılıqqa qarsı gúresiw hám huqıqbuzarlıqlardıń aldın alıw sistemasın jedellestiriw júzesinen ámelge asırılıwı lazım bolǵan wázıypalardıń biri sıpatında korrupciyaǵa qarsı gúresiwdiń shólkemlestiriwshi huqıqıy mexanizmlerin jedellestiriw hám korrupciyaǵa qarsı gúresiw is-ilajlarınıń nátiyjeligin asırıw etip belgilendi.

Ózbekstan Respublikası Prezidentiniń «Ózbekstan Respublikasında korrupciyaǵa qarsı gúresiw sistemasın jedellestiriw boyınsha qosımsha is-ilájlar haqqında»ǵı 2020-jılı 29-iyun kúngi Pármanı menen korrupciyaǵa qarsı gúresiwge qaratılǵan mámleketlik siyasattıń nátiyjeligin asırıw maqsetinde Ózbekstan Respublikası Korrupciyaǵa qarsı gúresiw agentligi shólkemlestirildi.

Bul Párman menen agentlik korrupciyanıń aldın alıw hám oǵan qarsı gúresiw tarawında mámleketlik siyasattı sáwlelendiriwi hám de ámelge asırıw ushın juwapker bolǵan arnawlı wákillikli mámleketlik organ esaplanıwı, óz iskerligin basqa mámleketlik organlar, shólkemler olardıń  lawazımlı shaxslarınan ǵárezsiz ámelge asırıwı, Ózbekstan Respublikası Prezidentine boysınıwı, Ózbekstan Respublikası Oliy Majlisi palataları aldında esap beriwi belgilendi.

2021-jılı 18-noyabr kúni Ózbekstan Respublikasınıń «Ózbekstan Respublikasında korrupciyaǵa qarsı gúresiw sistemasınıń jedellestiriliwine baylanıslı Ózbekstan Respublikasınıń ayırım nızam hújjetlerine ózgeris hám qosımshalar kiritiw haqqında»ǵı nızamı qabıl etilip, bul nızamǵa tiykar kiritilgen ózgeris hám qosımshalarǵa kóre «BMShniń Korrupciyaǵa qarsı konvenciyasına Ózbekstan Respublikasınıń qosılıwı haqqında»ǵı 2008-jılı 7-iyulda qabıl etilgen nızamda korrupciyanıń aldın alıw boyınsha anıq is-ilájlar islep shıǵıw hám olardı ámelge asırıwdı basqa mámleketlerge járdem kórsetetuǵın organlar qatarına Korrupciyaǵa qarsı gúresiw agentligi  hám kiritildi.

Bunnan tısqarı Ózbekstan Respublikasınıń «Korrupciyaǵa qarsı gúresiw haqqında»ǵı nızamǵa kiritilgen qosımsha hám ózgerislerge kóre korrupciyaǵa qarsı gúresiw agentligi korrupciyaǵa qarsı gúresiw boyınsha iskerlikti ámelge asırıwshı mámleketlik organlar qatarına kiritilip, onıń wákilllikleri belgilendi.

«Huqıqbuzarlıqlar profilaktikası haqqında»ǵı nızamda korrrupciyaǵa qarsı gúresiw agentligi huqıqbuzarlıqlar profilaktikasın tikkeley ámelge asırıwshı organlar dizimine kiritildi hám de onıń sol tarawdaǵı wákillikleri belgilendi.

Nókis rayonlararalıq hákimshilik sudı baslıǵı B.Dosımbetov