Ózbekstan Respublikası Prezidenti Shavkat Miromonovich Mirziyoev tárepinen 2021-jılı 18-noyabr kúni «Ózbekstan Respublikasında korrupciyaǵa qarsı gúresiw sistemasınıń jedellestiriliwine baylanıslı Ózbekstan Respublikasınıń ayırım nızam hújjetlerine ózgeris hám qosımshalar kiritiw haqqında»ǵı nızam imzalandı hám bul nızamnıń ózinde nızam rásmiy járiyalanǵan kúnnen baslap kúshine kiriwi belgilep qoyıldı.

Bul nızamda orın alǵan tiykarǵı ózgeris hám qosımshalar tómendegilerden ibarat:

– Jınayat orınlaw kodeksinde, «Jınayat isin júritiwde qamaqta saqlaw qaǵıydaları haqqında»ǵı hám de «Hákimshilik qamaqtı ótew tártibi haqqında»ǵı nızamlarda korrupciyaǵa qarsı gúresiw agentligi xızmetkerleri korrupciyalıq huqıqbuzarlıqlardıń bolıwın úyreniw hám de analiz etiw ushın jazanı orınlaw shólkemlerine tosqınlıqlarsız kiriw, hujjetler menen tanısıw huqıqına iye ekenligi belgilep qoyıldı.

– «Ózbekstan Respublikası Oliy Majlisi Nızamshılıq palatasınıń Reglamenti haqqında»ǵı, Ózbekstan Respublikası Oliy Majlisi Senatınıń Reglamenti haqqındaǵı hám de «Parlament baqlawı haqqında»ǵı nızamlarda Nızamshılıq palatası hám de Senattıń Korrupciyaǵa qarsı  gúresiw agentligi tárepinen tayarlanatuǵın Ózbekstan Respublikasında korrupciyaǵa qarsı gúresiw haqqındaǵı milliy bayanattı kórip shıǵıw tártibi belgilendi.

Oǵan kóre:

Nızamshılıq palatası hám de Senat Milliy bayanattı dáslepki tárizde kórip shıǵıp, pikir hám usınıslar islep shıǵadı, sonday-aq, Palata májilislerinde májbúriy dodalaydı, Parlament palatalarınıń Milliy bayanattı kórip shıǵıw boyınsha qabıl etken qararların Agentlikke jiberedi.

-BMShniń Korrupciyaǵa qarsı konvenciyasına Ózbekstan Respublikasınıń qosılıwı haqqındaǵı 2008-jılı 7-iyulda qabıl etilgen nızamında korrupciyanıń aldın alıw boyınsha anıq is-ilájlar islep shıǵıw hám olardı ámelge asırıwdı basqa mámleketlerge járdem kórsetetuǵın uyımlar qatarına Korrupciyaǵa qarsı gúresiw agentligi hám kiritildi.

-Ózbekstan Respublikasınıń «Korrupciyaǵa qarsı gúresiw haqqında»ǵı nızamǵa qosımsha hám ózgerisler kiritildi, atap aytqanda;

-Korrupciyaǵa qarsı gúresiw agentligi korrupciyaǵa qarsı gúresiw boyınsha iskerlikti ámelge asırıwshı mámleketlik uyımlar qatarına kiritilmekte hám de onıń wákilllikleri názerde tutılmaqta.

Korrupciyaǵa qarsı gúresiw boyınsha respublika mekemeler aralıq komissiyası Ózbekstan Respublikası korrupciyaǵa gúresiw milliy Keńesi etip qayta shólkemlestiriliwine baylanıslı tiyisli normalar kiritildi.

– «Huqıqbuzarlıqlar profilaktikası haqqında»ǵı nızamda korrupciyaǵa qarsı gúresiw agentligi huqıqbuzarlıqlar profilaktikasın tikkeley ámelge asırıwshı uyımlar dizimine kiritildi hám de onıń sol tarawdaǵı wákillikleri belgilendi.

– aldaǵı waqıtta korrupciyaǵa baylanıslı huqıqbuzarlıqlar haqqında xabar berip atırǵan shaxslar hám olardıń tuwısqanları mámleket qorǵawında boladı.

Sonlıktan men sizlerdi korrupciyaǵa qarsı gúresiwge birge islesiwge shaqırıp qalaman.

Itibarlarınız ushın raxmet.

Qaraqalpaqstan Respublikası

hákimshilik sudı baslıǵı A.Nurlipesov