2021-jıl 8-avgust kúni jınayat isleri boyınsha Qońırat rayonı sudı imaratında, ashıq sud májilisinde, jınayat isleri boyınsha Qońırat rayonı sudınıń sudyası E.Berdievtiń basshılıǵında, sudya járdemshisi Q.Mamıtovtıń xatkerliginde, mámleketlik ayıplawshı Qońırat rayonı prokrorınıń járdemshisi B.Ismaylov, sudlanıwshı R.K. hám onıń qorǵawshısı “FEMIDA QONIRAT” advokatlıq byurosı advokatı G.Kurbaniyazovanıń qatnasında, Ózbekstan Respublikası Jınayat kodeksiniń 248-statyası 1-bólimi menen ayıplanǵan R.K.tıń qarsısına bolǵan jınayat isi kórildi.

Qońırat rayonı, Jaslıq posyolka puqaralar jıyını aymaǵında jasawshı puqara R.K. atasınan qalǵan hesh qanday hújjetleri bolmaǵan 1958-jılı Rossiya Federaciyasında islep shıǵarılǵan, 16 kalibrli, 1 stvollı, «IJ» markalı, K modelli, 13202-sanlı oq atıw quralın tiyisli ruxsatnamasız, nızamsız túrde óziniń jasaw úyiniń ara tárepinde jaylasqan mal qoranıń ishinde saqlap qoyǵanlıǵı 2021-jıl 28-may kúni IIM xızmetkerleri tárepinen ótkerilgen “Qara dári” ilajları dawamında anıqlanǵan.

Qaraqalpaqstan Respublikası IIM Qońırat rayonı IIB EKB tárepinen ótkizilgen ballistikalıq ekspertizanıń 04.06.2021-jıl

21-sanlı juwmaǵında 16 kalibrli, 1 stvollı, «IJ» markalı, K modelli, 13202-sanlı oq atıw quralı oq atıwǵa jaramlı ekenligi kórsetilgen. “”

Sud tárepinen sudlanıwshı R.K. Ózbekstan Respublikası Jınayat kodeksiniń 248-statyası 1-bóliminde názerde tutılǵan jınayattı islegenlikte, yaǵnıy “oq atıw quralın nızamsız túrde saqlaǵanlıq”ta ayıplı dep tabılıp, tiyisli jazasın aldı.

Sudlanıwshı R.K. bul ok atıw quralın IIBne ıqtıyarıy tapsırǵanda jınayat juwapkershiligine tartılmaǵan bolar edi.

Jınayat isleri boyınsha Qońırat rayonı sudya járdemshisi Q.Mamıtov