Ruwxıy dúnyamızdıń bay bolıwı, sana-sezimimizdiń ósiwi hám álemdi tanıy alıwımız álbette kitap oqıwǵa baylanıslı. kitap tuwrı jolǵa baslawshı, hámiyshe adamlardı ómir haqıyqatına tik baǵıwǵa úndeytuǵın, bilimlerimizdi bayıtıwshı ǵáziyne. Kitap insandı tuwrı jolǵa baslaydı hám awır demlerde sadıq dos bola aladı. Áne usınday ápiwayı haqıyqatlardı jaslardıń sanasına sińdiriw maqsetinde Shomanay rayonında bir neshshe jıllardan berli «Bilimdanlar» intellektual oyınları basqıshpa-basqısh ótkerilip kelinbekte. Shomanay jasları ushın shólkemlestirilgen bul oyınlardı «Massaget» intellektual klubınıń tiykarın salıwshı, jaslardıń ádiwli ustazı nuranıy Nurxat aǵa Galiakberov Jaslar shólkemi menen birge ótkerip kelmekte.

Bul oyınlar hár jılı tek rayon orayında ótkerilip kelingen bolsa, usı jıldan baslap shetki aymaqlarda sektorlar kesiminde otkeriliwi belgilep alındı.

Usı jıldıń 3-noyabr sánesinde Jaslar isleri agentligi rayonlıq bólimi, Jaslar awqamı rayonlıq Keńesi, Xalıq bilimlendiriw bólimi hám «Massaget» intellektual klubı menen birgelikte «Bilimdanlar» intellektual oyınlarınıń sektorlar kesimindegi aymaqlıq basqıshına start berildi.

Aymaqlıq oyınlardıń birinshisi 18-sanlı mektepte ótkerilip, bul oyınlarǵa 2-sektor aymaǵındaǵı mektep oqıwshıları, jas oqıtıwshılar, mákeme ham shólkemlerdegi jaslar ham jámlespegen jaslardan quralgan jámi 21 komanda óz ara bellesti hám jenimpaz dep tabılǵan «Ketenler», «Everest», «Tumaris» hám «Pedagoglar» komandaları rayonlıq final basqıshına jollama aldı.

Shomanay rayonı hákimligi málimleme xızmeti