Ózbekstan Respublikası Prezidentiniń 2021-jıl 9-avgust kúngi “Bala huqıqlarınıń kepilliklerin támiyinlew sistemasın jáne de jetilistiriw is-ilajları haqqında”ǵı PP-6275-sanlı pármanı menen “Jas óspirimler isleri boyınsha mákemeleraralıq rayonlıq komissiyası” , “Balalar máseleleri boyınsha rayonlıq komissiya” bolıp qayta shólkemlestirildi. Bul komissiyanıń wazıypsı balalardı qollap-quwatlaw, olardıń nızamlı huqıq hám máplerin qorǵaw, bos waqıtların mazmunlı ótkeriw maqsetinde rayonda balalar arasında qadaǵalawsızlıq, qarawsızlıq, huqıqbuzıwshılıqlardıń hám basqa da is háreketlerdiń aldın alıw bolıp tabıladı.

2021-jıl 30-oktyabr kúni Shomanay rayonı Xalıq bilimlendiriw bólimine qaraslı 1-sanlı orta mektepte Balalar máseleleri boyınsha rayonlıq komissiyasınıń náwbettegi kóshpeli májilisi bolıp ótti. Bul májiliste usı mektep oqıwshısı jas óspirim Q.Í.nıń islegen huqıqbuzarlıǵı boyınsha rayon ishki isler bólimi tárepinen Ózb.Res HJhKniń 47-statyası birinshi bólimi menen toplanǵan is materialları kórip shıǵıldı. Ózb.Res HJhKniń 47-statyası birinshi bóliminde tómendegiler kórsetip ótilgen: Ata-analar yaki olardıń ornın basıwshı shaxslar tárepinen er jetpegen balalardı tárbiyalaw hám olarǵa bilim beriwdegi májbúriyatların orınlamaw, sonday-aq er jetpegen balalardıń hákimshilik huqıqbuzarlıq sadır etiwine alıp keliwi bazalıq esaplaw muǵdarınıń bir esesinen bes esesine shekem járiyma salıwǵa sebep boladı.

Ózbekstan Respublikası Konstituciyasınıń 64-statyasında kórsetilgen ata-analar wazıypaları, sonday-aq, Ózbekstan Respublikası Shańaraq Kodeksiniń 73-statyasında kórsetilgen ata-analar óz perzentlerin tárbiyalaw huqıqına iye hám olardı tárbiyalaw, ǵamxorlıq qılıwı shártligi, perzentleriniń keleshegi ushın juwapkerligi, perzentlerin ámeldegi Nızam hújjetlerinde belgilengen zárúr dárejede bilim alıwınıń shártligi, Ózbekstan Respublikası «Bilimlendiriw haqqında»ǵı Nızamnıń tiyisli statyalarında kórsetilgen jas óspirimlerdiń ata-anaları yaki olardıń nızamlı wákilleri (bekitilgen qáwenderler) jas óspirimniń nızamlı huqıqları hám máplerin qorǵawı shártligi hám de olardıń tárbiyası, mektepke shekem, ulıwma orta, orta-arnawlı kásip-óner tálim alıwları ushın juwapker dep kórsetilgen.

Májilis juwmaǵına kóre Q.Í. juwapkershilikke tartılıw jasına jetpegenligi sebepli ákesi S.Jqa Ózb.Res HJhKniń 47-statyası birinshi bóliminde kórsetilgen huqıqbuzarlıq tolıq sadır etilgen dep tabılıp, BEMnıń 1esesi muǵdarında járiyma jazası qollanıldı.

Shomanay raoynı hákimligi málimleme xızmeti