Mámleketimiz nızamshılıǵına kóre avtotransport quralın basqarıw ushın beriletuǵın gúwalıq 18 jastan beriliwi belgilep qoyılǵan, álbette bul tosınnan emes, sebebi jol háreketinde hár túrli waqıyalar ushırasıwı múmkin, sonday jaǵdaylarda transport quralı basqarıwshısı tiyisli qollanbaǵa tiykar háreket etiwi lazım boladı, qollanbaǵa ámel etpew bolsa nızamshılıq qaǵıydalarına kóre tiyisli juwapkershilikti keltirip shıǵaradı.

Sudlanıwshı 2003-jılda tuwılǵan jas óspirim Shuxrat (atı ózgertildi) 2020-jıl 15-mart kúni saat 15:25 lerde óziniń aǵasına tiyisli bolǵan «Lasetti» markalı avtomashinanı, transport quralın basqarıw huqıqın beriwshi tiyisli hújjetlersiz, ekinshi dárejeli jol esaplanǵan Qońırat rayonı «Nawayı» kóshesi boylap shıǵıstan-batısqa qaray basqarıp baratırıp, jol háreketi qaǵıyda talapların qopal túrde buzıp, jol háreketi qaǵıydalarına ámel qılmastan, birinshi dárejeli jol esaplanǵan «Qaraqalpaqstan» kóshesi menen arqadan-qublaǵa háreketlenip kiyatırǵan puqara Maxmudtıń basqarıwındaǵı «Neksiya» markalı transport quralına jol berip ótkerip jibermesten soqlıǵısıp, soqlıǵısıw nátiyjesinde «Neksiya» avtomashinası basqarıwın joǵaltıp asfalt jolda aylanıp ketip, joldıń shetinde turǵan piyada Salamattı hám jol shetinde ketip baratırǵan Nasibanı qaǵıp jibergen, sol arada jas óspirim Shuxrat júz bergen jol transport hádiysesi aqıbetinde ómiri hám den-sawlıǵı qáwip astında qalǵan puqaralar Salamat hám de Ranolarǵa birinshi járdem kórsetpesten, olardı qáwip astında qaldırıp jol transport hádiysesi júz bergen orınnan qashıp ketken.

Sud-medicinalıq еkspertizasınıń juwmaqlarında puqara Nasibanıń densawlıǵınıń qısqa múddetke buzılıwına alıp kelmegen «jeńil» dárejedegi, al puqara Salamattıń densawlıǵına «awır» dárejedegi dene jaraqatı jetkizilgeni kórsetilgen.

Sudlanıwshı jas óspirim Shuxrat joqarıdaǵı jınayıy háreketleri menen Ózbekstan Respublikası Jınayat Kodeksiniӊ 266-statyası 1-bólimi hám

117-statьyası 1-bóliminde názerde tutılǵan jınayatlardı islegen.

Sud májilisinde, sudlanıwshı jas óspirim Shuxrat ayıbın tolıq moyınlamaǵanı menen, sud májilisine kelgen jábirleniwshilerdiń hám gúwalardıń kórsetpeleri menen Shuxrattıń ayıbı óz tastıyǵın taptı.

Sudlanıwshı jas óspirim Shuxrat Ózbekstan Respublikası

266-statyası 1-bólimi hám 117-statyası 1-bóliminde kórsetilgen jınayattı islegenlikte ayıplı dep tabıldı hám oǵan JKniń 266-statyası 1-bólimi menen JKniń 821-statyası tártibinde 180 (bir júz seksen) saat májbúriy jámiyetlik isleri jazası, JKniń 117-statyası 1-bólimi menen JKniń 821-statyası tártibinde 150 (bir júz eliw) saat májbúriy jámiyetlik isleri jazası tayınlandı, tayınlanǵan jazalar JKniń 59-statyası tártibinde belgili bir bólegi qosılıp 200 (eki júz) saat májbúriy jámiyetlik isleri jazası tayınlandı.

 Jınayat isleri boyınsha Qońırat rayonı sudınıń sudya járdemshisi:Q.Mamıtov