Буннан бирнеше жыллар алдын пуқаралар исбилерменлик искерлиги менен шуғылланыўы, исбилермен сыпатында мәмлекетлик дизимнен өтиўи, соның менен бирге мәмлекетлик хызметтен пайдаланыў ҳәм мәмлекетлик хызметлерин алыў ушын, ҳәр бирмәкеме, кәрхана, шөлкемлерге барып, нәўбет күтип, көплеген әўерегершилик ҳәм қыйыншылықларға ушырап, күнлер, ҳәптелер даўамында жүриўлерине мәжбүр болатуғы неди.

Бундай қыйыншылықлар ҳәмде әўерегершиликлерди сапластырыў мақсетинде бүгинги күнде мәмлекетимиз тәрепинен исбилерменлик субъектлерин қоллап қуўатлаў ҳаққында қөплеген Пәрман ҳәм қарарлар қабыл етилип, исбилерменлик искерлиги менен шуғылланыўы, мәмлекетлик дизимнен өтиўи, соның менен бирге исбилерменлик тараўына байланыслы қандайда бир мәмлекетлик хызметин алыўы ушын басқа мәкеме, кәрхана, шөлкемлерге барып жүрместен Мәмлекетлик хызметлер орайына мүрәжат етиўге имкәният жаратылды. Бул өз гезегинде исбилерменлик субъектлери жумысларының бир орынның өзинде шешилиўинде кең имкәниятлардың жаратылғанынан дерек береди.

Исбилерменлик субъектлерин мәмлекетлик дизимнен ҳәмде қайта дизимнен өткериў Мәмлекетлик хызметлер орайлары тәрепинен Өзбекстан Республикасы Министрлер Кабинетиниң 66‑санлы қарары менен тастыйықланған «Исбилерменлик субъектлерин мәмлекетлик дизимнен өткериў тәртиби ҳаққында»ғы Режеге муўапық әмелге асырылмақта.

Усы Режениң 2-қосымшасында исбилерменлик субъектлерин мәмлекетлик дизимнен ҳәмде қайта дизимнен өткериў ушын өндирилетуғын мәмлекетлик бажылар ҳәм жыйымлар ставкалары  көрсетилген болып, бунда исбилерменлик субъектлерин мәмлекетлик дизимнен өткериўде (Юридикалық шахс шөлкемлестирген ҳәмде юридикалық шахс шөлкемлестирмеген дийхан хожалықларынан тысқары) базалық есаплаў муғдарының 1 есеси муғдарында, ал қайта дизимнен өткериўде базалық есаплаў муғдарының 50 пайызы муғдарында бажы өндириў белгиленген еди.

Усы жылдын 20-май күни «Мәмлекетлик бажы ҳаққында»ғы Өзбекстан Республикасы Нызамына өзгерис ҳәм қосымшалар киритиў ҳаққында 619-санлы Нызамы қабыл етилип, Нызамға тийкар, ендиликте жоқарыда корсетилген исбилерменлик субъектлерин мәмлекетлик дизимнен ҳәмде қайта дизимнен өткериўде өндирилетугын мәмлекетлик бажы муғдары базалық есаплаў муғдарының 1 есеси етип белгиленди.

Сондай-ақ, Нызам менен юридикалық шахс болған исбилерменлик субъектлерин, жеке тәртиптеги исбилерменлер, юридикалық шахс шөлкемлестирмеген шаңарақлы исбилерменлик субъектлерин ҳәмде юридикалық шахслар бирлеспелерин мәмлекетлик дизимнен яки қайта дизимнен өткерилгенде базалық есаплаў муғдарының 1 есеси муғдарында бажы төленетуғынлығы белгилеп қойылды.

«Мәмлекетлик бажыҳаққында»ғы 2020-жыл 20-май күнги 619-санлы Өзбекстан Республикасының Нызамы ҳаққында толық мағлыўматларды https://lex.uz сайты арқалы алсаңыз болады.

Мәмлекетлик Хызметлер агентлиги Қарақалпақстан Республикасы басқармасы бөлим баслығы Х.Нурымбетов