2020 йил учун Шуманай туманининг бюджет параметрларини тасдиқлаш тўғрисида

Ўзбекистон Республикасининг 2019 йил 9 декабрдаги “2020 йил учун Ўзбекистон Республикасининг Давлат бюджети тўғрисида”ги ЎЗҚ-589-сонли Қонуни, Ўзбекистон Республикаси Молия вазирлигининг 10 декабр кунги 04/04-20-02-34/5404-сонли хати ва Қорақалпоғистон Республикаси Жўқорғи Кенгесининг 2019 йил 16 декабрдаги ХХIХ-сессиясини инобатга олиб, Шуманай тумани бюджети харажатларини тасдиқлаш, бюджет даражалари ўртасидаги муносабатларни тартибга солиш мақсадида Халқ депутатлари Шуманай тумани Кенгаши

Қ А Р О Р   Қ И Л А Д И:

1. Ўзбекистон Республикасининг 2019 йил 9 декабрдаги “2020 йил учун Ўзбекистон Республикасининг Давлат бюджети тўғрисида”ги ЎЗҚ-589-сонли Қонуни (бундан кейин Қонун деб аталади) билан 2020 йилги Қорақалпғистон Республикаси бюджетига Ўзбекистон Республикаси бюджетидан ажратиладиган Шуманай тумани бюджетининг даромад ва харажатлари белгиланганлиги маълумот учун қабул қилинсин.

2. Шуманай тумани маҳаллий бюджетининг 2019 йилги даромад ва харажатлар бўлагининг асосий кўрсаткичларининг кутилганидек ижро этилганлиги маълумот учун қабул қилинсин.

3. Шуманай туманининг 2020 йилга мўлжалланган маҳаллий бюджетининг даромадлар бўлаги 1-иловага, харажатлар бўйича бўлаги
2-иловага мувофиқ тасдиқлансин.

4. Шуманай тумани Молия бўлимига белгиланган тартибда тегишли маҳаллий бюджетларга харажатлар ва бюджет суммаларини (даромад ва харажатлар орасидаги вақтинчалик касса фарқларини қоплаш учун) ажратишда, уларнинг миқдорини туман бўйича барча солиқлар ва бошқа мажбурий тўловлар тўлиқ тушишидан, шунингдек иш ҳақи (ижтимоий тўлов билан), нафақалар ва уларга тенглаштирилган тўломлар бўйича бюджет харажатлари биринчи навбатда сўзсиз молиялаштирилиши зарурлигидан келиб аниқлаштириш ҳуқуқи берилсин.

5. Шуманай тумани ҳокимининг иқтисодиёт ва тадбиркорлик масалалари бўйича биринчи ўринбосари (Қ.Ходжаметов) тегишли идоралар раҳбарлари билан биргаликда:

бюджет даромадларининг тасдиқланган кўрсаткичлари ижросини таъминлаш;

ҳудудларда солиқ солиш базасини кенгайтириш ҳамда корхоналарнинг молиявий аҳволини яхшилаш бўйича зарур чора-тадбирлар кўриш;

бюджет маблағларининг мақсадли фойдаланилиши устидан қатъий назорат олиб борсин.

6. Шуманай тумани ҳокимининг иқтисодиёт ва тадбиркорлик масалалари бўйича биринчи ўринбосари (Қ.Ходжаметов), Шуманай тумани Давлат солиқ инспекцияси (З.Кадиров)  бюджет тушумига қўшимча манбаларини аниқлаш, кам қувватликда ишлаётган корхоналарнинг ишлаб чиқариш қувватини ошириш, корхоналарнинг қарздорликларини (недоимка) қисқартириш ҳамда ҳаракатсиз турган кичик бизнес субъектларини ишка тушириш натижасида туман маҳаллий бюджетининг даромадларини солиқ турлари бўйича ошириб борилишини таъминлаш.

7. Шуманай тумани Молия бўлими (А.Султанов)га: 

Шуманай тумани маҳаллий бюджетининг 2020 йил давомида маҳаллий бюджет даромадларининг қўшимча харажатлари манбаи ҳисобидан туманнинг ижтимоий-иқтисодий ривожланиб боришидаги чора-тадбирларни амалга ошириш учун зарур ўзгартиришлар киритиб бориш;

бюджетдан маблағ олувчиларни маблағ билан таъминлашнинг асослилигини чуқур таҳлил қилиб бориш;

зарур ҳолларда бюджет маблағларидан сақланиши асоссиз деб топилган ва бюджет маблағларининг мақсадсиз ишлатилиши ҳолатлари пайдо бўлган бюджет ташкилотларини қисқартириш масалалари бўйича туман ҳокимлигига ва тегишли бошқармаларга таклиф киритиш;

Халқ депутатлари Шуманай тумани Кенгашига маҳаллий бюджетнинг ижроси бўйича ҳар чоракда ҳисобот киритиб бориш;  

туман Ғазначилик бўлинмаси билан биргаликда бюджет маблағларининг мақсадли ишлатилиши ҳамда уларнинг мақсадсиз ишлатилишининг олдини олиш устидан ғазначилик ижроси рўйхати орқали қатъий назоратга олиш топширилсин.

8. Халқ депутатлари Шуманай тумани Кенгашининг 2018 йил 27 декабр кунги “2018 йилда Шуманай туманининг ижтимоий-иқтисодий ривожлантиришнинг якунлари ва 2019 йилга маҳаллий бюджетнинг прогноз параметрлари ҳақида”ги 38/144-сонли қарори 2019 йилнинг 31 декабр кунидан бошлаб ўз кучини йўқотган деб ҳисоблансин.

9. Ушбу қарорнинг ижросини назорат қилиш Халқ депутатлари Шуманай тумани Кенгашининг маҳаллий бюджет, иқтисодий ислоҳотларни амалга ошириш ва тадбиркорликни ривожлантириш масалалари бўйича доимий комиссиясига юклатилсин.

10. Туманнинг 2020 йилга белгиланган бюджет параметрлари туман “Шоманай нуры” газетасида ҳамда ҳокимлик веб сайтида эълон қилинсин.

11. Мазкур қарор расмий эълон қилинган кундан бошлаб кучга киради.

Халқ депутатлари Шуманай тумани
Кенгаши раиси                                                   Б.Янгибаев

2019 йил 18-декабр 49/194-сон